Rhoi adborth ar y tudalen hon

Mae Cyngor Sir Ddinbych wedi lansio ymgynghoriad swyddogol ar gynlluniau i ad-drefnu addysg ôl 16 yn y Rhyl.

Ym mis Chwefror, cytunodd Cabinet Sir Ddinbych i'r Cyngor ymgynghori ar y cynlluniau i gau y chweched dosbarth yn Ysgol Uwchradd y Rhyl ac Ysgol Uwchradd y Bendigaid Edward Jones.  Bydd y cynllun yn cynnwys darparu addysg ac hyfforddiant ôl 16 yng Ngholeg Llandrillo Y Rhyl.

Byddai Coleg Llandrillo Y Rhyl yn gyfrifol am addysg ôl 16 yn y Rhyl o 2009, gyda chanolfan chweched dosbarth newydd yn agor yn ystod 2010.

Dywedodd Dr Mohammed Mehmet, Cyfarwyddwr Corfforaethol-Dysgu Gydol Oes Dros Dro: 'Mae yna gydnabyddiaeth eang bod angen newidiadau radical i addysg chweched dosbarth yn y Rhyl.

'Bydd y datblygiad arffaethedig yn cael ei frandio 'Chweched Y Rhyl' - fyddai'n adlewyrchu ymrwymiad i safonau academaidd coleg chweched dosbarth traddodiadol, tra'n pwysleisio fod hwn yn fodel fyddai'n paratoi ein pobl ifanc ar gyfer llwyddiant yn y dyfodol mewn addysg uwch a'r byd gwaith.

Bydd digwyddiadau ymgynghori yn cael eu cynnal yng Ngholeg Llandrillo Y Rhyl ar Ebrill 28ain ar gyfer rhieni, y gymuned addysg a busnesau lleol.  Bydd manylion pellach yn cael eu cyhoeddi ar y wefan ac yn y wasg yn fuan.

Mae'r ddogfen ymgynghorol ar gael ar y wefan: www.sirddinbych.gov.uk neu o lyfrgelloedd y sir.

Dylai unrhyw ymatebion i'r ymgynghoriad gael eu gyrru at y Gwasanaeth Gwelliant Ysgol, Cyfarwyddiaeth Dysgu Gydol Oes, Cyngor Sir Ddinbych, Trem Clwyd, Canol y Dre, Rhuthun, LL15 1YN, neu drwy e-bost at: admineducation@denbighshire.gov.uk