Prosiectau Cronfa Ffyniant Gyffredin y DU: Darpariaeth Ardaloedd Chwarae Hygyrch
Arweinydd y Prosiect: Cyngor Sir Ddinbych
Mae’r prosiect nawr wedi’i gwblhau.
Trosolwg o’r prosiect
Bydd y prosiect hwn yn darparu ardaloedd chwarae mewn lleoliadau strategol ar draws y sir sy’n hygyrch i bawb drwy osod cyfarpar arbenigol a gwneud gwelliannau i lwybrau cerdded a dodrefn stryd yn y parth cyhoeddus a’r ardal gyfagos.
Diweddariad y prosiect
Crynodeb olaf y prosiect (Blwyddyn Drosiannol 2025–26)
Mae ailddatblygiad Ardal Chwarae Traeth Canol ym Mhrestatyn wedi ei gwblhau yn llwyddiannus, gan ddarparu lle modern, cynhwysol a deniadol i’r gymuned leol.
Wedi ei ariannu trwy Gronfa Ffyniant a Rennir y DU a’i reoli gan adran Gwasanaethau Stryd Cyngor Sir Ddinbych, mae’r prosiect wedi trawsnewid y safle gyda dyluniad glan môr newydd sy’n adlewyrchu ei leoliad arfordirol.
Mae’r ardal chwarae a uwchraddiwyd yn cynnwys offer hygyrch a synhwyraidd, gan alluogi plant o bob gallu i gyd-chwarae, wrth hyrwyddo datblygiad corfforol a gwybyddol trwy gyfleoedd chwarae amrywiol a deinamig.
Darparwyd trwy KOMPAN - sydd hefyd wedi ailddatblygu ardaloedd chwarae yn llwyddiannus ym Mharc Drift a Marchnad y Frenhines - mae’r prosiect yn adeiladu ar raglen ehangach o welliannau ansawdd uchel ar draws y sir.
Bu i’r agoriad swyddogol, a gefnogwyd gan ddisgyblion o Ysgol Bodnant, nodi carreg filltir gymunedol gadarnhaol gydag ymgysylltiad lleol cryf.
Ar y cyfan, mae’r prosiect wedi cyrraedd ei amcanion, sef:
- gwella darpariaeth chwarae
- gwella hygyrchedd
- cefnogi iechyd a lles trigolion ac ymwelwyr
- creu ased cymunedol gwerthfawr a hirdymor
Crynodeb y prosiect - mis Rhagfyr 2022 i fis Mawrth 2025
Roedd y prosiect Darpariaeth Ardaloedd Chwarae Hygyrch yn canolbwyntio ar feysydd chwarae cynhwysol yn Rhuthun a Phrestatyn.
Darparwyd gwelliannau i dros 2000 m² o barthau cyhoeddus yn ogystal ag uwchraddio 2 gyfleuster chwarae, sydd wedi arwain at adborth cadarnhaol gan y gymuned, rhagor o ddefnydd gan deuluoedd, a hygyrchedd gwell er mwyn sicrhau ardaloedd chwarae cynhwysol i blant.
Mawrth 2024
Mae’r tîm wedi cael trafodaethau cychwynnol a chyfarfod safle gyda STAND er mwyn trafod a datblygu syniadau am y ffordd y gall ardal chwarae hygyrch gael ei ddarparu. Ar hyn o bryd mae dewisiadau yn cael eu harchwilio ac mae costau cychwynnol yn cael eu nodi gyda chyflenwyr ar gyfer darnau amrywiol o offer.
Disgwylir i’r gwaith adeiladu ddechrau yn Ebrill 2024.