Treth y Cyngor: rhyddhad o dalu’r premiwm am dri mis ar gyfer eiddo gwag hirdymor sy’n cael ei adnewyddu’n sylweddol

Os ydych chi wedi dod yn berchen ar eiddo a fu’n wag am o leiaf pum mlynedd, efallai y gallwn gynnig rhyddhad o dalu premiwm Treth y Cyngor am dri mis os ydych chi’n gwneud gwaith adnewyddu cyffredinol yno.

Y bwriad yw helpu perchnogion newydd cartrefi a fu’n wag ers tro i’w rhoi at ddefnydd o’r newydd fel prif breswylfeydd parhaol.

Beth sydd ar gael?

Os cymeradwyir eich cais, diddymir premiwm Treth y Cyngor am dri mis. Mae hynny’n golygu y byddwch yn talu swm safonol Treth y Cyngor am y cyfnod, yn hytrach na’r gyfradd premiwm.

Pwy sy’n gymwys?

Gallech fod yn gymwys i gael rhyddhad o dalu’r premiwm am dri mis ar gyfer eiddo gwag hirdymor:

  • os daethoch yn berchennog newydd yr eiddo yn y chwe mis diwethaf
  • os bu’r eiddo’n wag heb fawr ddim dodrefn ynddo am o leiaf pum mlynedd cyn ichi ddod yn berchennog - cysylltwch â ni os hoffech gael gwybod hyn
  • os ydych yn gwneud gwaith adnewyddu sylweddol i wneud yr eiddo’n addas i fyw ynddo
  • os bwriedir defnyddio’r eiddo’n brif breswylfa ar ôl gorffen y gwaith.

Mae adnewyddu cyffredinol yn cynnwys, er enghraifft:

  • peintio ac addurno
  • gosod lloriau, carpedi, ffenestri neu ddrysau newydd
  • gosod cegin neu ystafell ymolchi (heb unrhyw waith strwythurol o bwys)
  • ailosod gwifrau trydanol neu osod system gwres canolog newydd
  • mân waith trwsio ar do
  • trwsio offer plymio
  • trin lleithder
  • mân waith plastro neu drwsio nenfwd.

Ni chaniateir rhyddhad ar gyfer:

  • ail gartrefi
  • llety gwyliau
  • eiddo na fwriedir byw ynddo fel prif breswylfa
  • eiddo lle nad oes unrhyw waith adnewyddu’n digwydd

Sut i wneud cais

Mae’n rhaid ichi lenwi’r ffurflen gais ar-lein.

Wrth ymgeisio, efallai y bydd gofyn ichi ddarparu gwybodaeth neu ddogfennau ategol ynghylch:

  • yr eiddo
  • pa bryd y bu’n wag
  • y gwaith adnewyddu sy’n digwydd.

Asesir pob cais yn ôl ei rinweddau ei hun.

Gwnewch gais ar-lein am ryddhad o dalu premiwm Treth y Cyngor am dri mis ar gyfer eiddo gwag hirdymor

Newid yn eich amgylchiadau

Mae’n rhaid ichi roi gwybod inni am unrhyw newidiadau a fedrai effeithio ar eich cais.

Os na wnewch chi hynny, gallwn dynnu’r gostyngiad yn ôl a gofyn am ad-daliad o’r swm y rhoddwyd rhyddhad o’i dalu eisoes.

Cysylltwch â ni i roi gwybod am unrhyw newid yn eich amgylchiadau.